- 732 -

1448. Mai 21.

Vnsern frundlichen grus zuuor. Erbern, weizen, lieben frunde. Als wir denne mittenander solden zusampne komen sein zum Newmargte off den mornigen tag, so haben wir botschafft vnd warnunge von guten frunden, das herczoge Wlodko sampnunge hot zu rosse vnd zufusse vnd meynet vns zubeschedigen, als her ouch iczund zu euch ym lande zugegriffen hot als wir horen vnd dorumme so gehet der tag off dis mol abe vmb solcher sachen willen, wenn wir bey warnunge sein mussen vnd bitten euch, das ir ouch bey warnunge sein wellet, wenn wir noch vorstehen konnen, woroff das geet vnd was man meynet vor zunemen. Auch hot vns vorgelegit Vicencz Tscheczke, wie her off sein guet geladen sey zu euch in ewer gerichte vnd wie her geleite von euch begert hette vor gewalt, das im nicht hette mogen widerfarn, bitten wir euch fruntlichen, ir wellet in sichern vnd geleiten in ewer gerichte vor gewelden, off das her sein guet vorantworten moge vnd dorunder nicht zuschaden kome, des wellen wir euch gerne danken vnd bitten ewer vorschreben antwort. Geben am dinstage noch Trinitatis anno etc. XLVIII°.
Ratmanne der stat Breslow.

Mit Rückaufschrift an den liegnitzer Rath.

Orig. Kgl Bibl. z. Berl Ms. Boruss. f. 568. No. 32.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866